Меленковское старообрядчество

Суббота, 19.01.2019, 00:02

Приветствую Вас Гость | RSS | Главная | Регистрация | Вход

Главная » 2018 » Апрель » 12 » О кресте видимом знамении Сына Человеческаго, Господа нашего Исуса Христа,иже во время страшнаго пришествия Его, явится на облацех небесных.
01:54
О кресте видимом знамении Сына Человеческаго, Господа нашего Исуса Христа,иже во время страшнаго пришествия Его, явится на облацех небесных.

А еже иконоборцы и се написаша в книгах своих, яко крест не Божиим повелением есть сотворен, но умышлением людским. к тому же еще приложиша. ибо вемы, яко никто же нам от святаго писания, не может показати и довести, когда Бог крест творити повеле. Мы же к ним рцем. о сем уведите окаяннии, яко можем довести и показати вам, яко сам Господь наш Исус Христос, победу на враги крест творите повеле. но и в прежнем еще законе, истинное подобие, пророки назнамена еще правоверная церкви имеет видимое знамение честнаго креста. о нем же пророк Исаия рече сице [Исаия, 66], и приидут и узрят славу Мою. и оставлю на них знамение. кое же знамение; явно есть глаголют святии, еже есть крест. на той бо вшед Господь распятися, и даде видети славу свою [Мф. зач. 113]. земля потресеся, и камение распадеся. гроби отверзошася, и многих святых телеса усопших восташа. и внидоша во святыи град Иеросалим. Той бо крест нань же вшед Господь, и такову славу свою показа, яко всему миру явлена есть. и остави его знамение церкви своей. и тем явну славу творит и в неверных, и прославляет. яко тем же Исаием обеща тако глаголя [Исаия, 60]. слава ливанова к тебе приидет, кипарисом и певгом, и кедром прославити место святое Мое. В тех бо трех древесех, якоже прежнии учители свидетельствуют сотворен бысть крест; нань же вшед Господь, прослави церковь. и по словеси Давыдову, яко оружием благоволения венчал еси нас. Ибо на той сам волею своею вшед яко оружием благоволения венчал есть нас, спасением. тоже древо честнаго креста Христова бысть благословено. иное же древо, из него же бысть сотворено на честь, ложным кумиром нечистым богом, проклято. якоже о них Соломон глаголет; благословится древо, им же бывает правда; древо же в нем же истесан кумир, и вместо Бога именуют е, проклято есть, и с тем, кто его истеса. Видите иконоборцы, яко Дух Святыи разность в древе положи. ибо то древо, им же бывает правда, благословится глаголет. яко воистину на древе крестнем, распеншимься на нем, бысть нам правда, и  того ради благословено. древо же из него же сотворено в честь ложным богом, и яко е бога именуют, проклято есть. что же вы противницы, и раскольницы церкви Божия, за едино полагаете древо благословеное, такоже и проклятое; или хощете мудрейши Бога быти. зрите убо врази честнаго креста, яко не иное какое древо пророк Духом Святым называет благословным; точию якоже вси святии наследницы апостольстии, свидетельствуют знамение честнаго креста, иже явится на облацех небесных, пред вторым Господним пришествием на суд. И имате вы за то свое поругание плакати во веки бесконца, и утешающаго не будет в вас. якоже Матфей евангелист свидетельствует [Мф., зач. 100]. егда явится знамение Сына Человеческаго на небеси, тогда восплачются вся колена земная. и узрят Сына Человеческаго грядуща на облацех небесных. что же и кое знамение явится; аще хощете в соединении пребыти со святыми нашими учители, имате разумете, и познаете, яко крест. Вси бо святии наследницы апостольстии явствено свидетельствуют [Василий В., Кирил Иерос., Иоанн Злат., Феофилакт, и инии], яко не иное которое знамение тогда явится, токмо крест. Ибо знамение глаголет святыи Кирил, свое есть Христу, крест. таже паки еще приложи, святое крестное знамение предъидет пред Царем, и объявляет пришествие Распятаго первее, да видевше вси врази его, и начнут плакати своего безумия. Всем бо неверным, и всем врагом креста Христова конец, погибель. занеже им зде бог чрево, и слава на посрамление их. якоже о том явствено апостол Павел глаголет [к филип., зач. 245]. мнози бо ходят, о них же многажды глаголах вам; ныне же и плача глаголю, враги креста Христова, им же кончина погибель, им же бог чрево, и слава в студ их, иже земная мудрствующе. Ибо противницы противу тех глагол отвещают рекуще, что убо есть, иже ради креста сребрянаго и древянаго бысть в посрамление. инии же рекут, не о том кресте писа апостол. Испытаем же и мы их, о котором апостол писа; аще рекут о страсти и о терпении, еюже хвалятся яко Христос учеником повеле крест терпети носити. и по тому Господню словеси всякое изгнание и мучение, и до крове терпение ради имене Его, крест есть. и о сем уведите, яко они суть врази креста Христова, ради бога своего чрева, и славы иже суть на срамоту им поругающеся, видимому Христову знамению кресту Христову. угожая богу своему чреву, церкви Божия ограбиша, кресты и иныя утвари церковныя себе взяша. и святаго имения, кони, и ризы, и сосуды богу своему чреву в честь претвориша. возлюбиша бо света сего суетную славу на срамоту себе. ибо света сего земная мудрость, буйство есть. Пророк бо Духом Святым глаголет [Пс. 25]. Господи возлюбих благолепие дому Твоего. а они пограбивше благолепие дому Божияго, и кресты с них свергше, подобно мечетем еллинским сотвориша. строение же церковное отданое Богу в честь, себе привлекли. и глаголют, добре есмы то учинили, якоже церковь, тако и костел, равно есть, якоже в церкви, тако и в костеле молитися. Бог бо сего ничего не хощет. ибо злата и сребра Бог не требует. Ведайте же о сем, яко не токмо не требует Бог церковнаго благолепия и красоты, но и гнев свой на них разныи попущает, кто тако дерзнет творити, яко же Даниил пророк пишет [Даниил, 5]. тогда Волтасар царь взя церковныя сосуды из дому Божияго, и чтяще своего бога чрева, пияше от них, и веселяся с вельможами своими, и за то тоя нощи убиен бысть. Когда же и Исус Наввин взят град Иерихон [Исус Нав., 6], и повеле все злато и сребро, и медь и железо собравши отдати в дом Господень, и рече к людем, да ничего себе не возмут злата и сребра и меди, ибо то отдано Богови. Тогда же Ахар дерзну взяти, двесте гревен сребра, и кубок злат, Бог же повеле его за то сожещи, и сожгоша его. Что же о противниче, чего ради тогда не рек Богу, иже повеле сожещи Ахара, ради злата и сребра. ибо то тебе несть на потребу, яко ныне нам глаголете грабящи церковь. К тому же сие уведите, иже в новом законе царь Иулиян отступи от християнства, и бысть идоложрец. и церкви Божия пограби, третияго лета царьствия своего. и за то вельми зле и страшне живота своего гоньзнул. Такоже и инии иконоборцы и врази, видимаго знамения Христова честнаго креста, зле и нагло погибоша, яко о том кроники древнии, и писания церковная свидетельствуют. или не имать ли мстити и вам всем, егда приидет судити всей земли, и явит оно знамение свое честныи крест, ему же вы ныне поругание творите, и грабите на нем сребро и злато, глаголюще, ничто бо се Богу, не требует Бог злата и сребра. И прилагаете в слове своем, речи противныя Христу, яко бы учаше в евангелии Господь, и во уставы церковныя предано сице. всуе мя хвалят иконами или крестом, учаще учения и умышления людьская. и то есте подтвердили рекомое Матфеем евангелистом, якобы то он в зачале шестьдесятом написа. и тамо же паки, якоже бы вы сыскавше прикладаете сице. слышите, Христос теми вашими умышлении не хощет быти хвален. Како же есте смели тако явне евангелиста впреки писати. ибо он того словесе, не токмо в том шестьдесятом зачале, но и во всем евангелии своем не написал. А о том что в той главе Матфей пишет, всуе чтут Мя, учаще учения заповеди человеческия, и то не явне ли евангелист тамо паки исповедует, яко то Господь не ко учению ни ко уставу церковному глагола, яко вы ко иконам и ко кресту прилагаете. но обличая тогда книжник и фарисеов глагола, яко же евангелист Матфей глаголет [Мф., 60, Мк. 28]. Тогда приступиша ко Исусу, иже от Иеросалима книжницы и фарисее глаголюще, почто ученицы Твои преступают предание старец, не умывают рук своих, егда хлеб едят; он же отвещав рече им, почто и вы преступаете заповедь Божию за предание ваше. Бог бо заповеда глаголя, чти отца твоего и матерь. вы же глаголете, иже аще речет отцу или матери дар, еже аще от Мене ползовался еси, и да не почтет отца и матери. и разорили есте заповедь Божию. таже паки приложи им Господь, лицемери, добре пророчества о вас, Исаия глаголя, приближаются Мне людие сии устнами своими, и устнами чтут Мя, сердце же их далече отстоит от Мене. всуе же чтут Мя, учаще учения заповеди человеческия. Видите противнии, яко то Господь рек не во учение заповеди апостольския, и их наследников, еже им повелеша недокончанное, и недостаточное исполнити. но о самовольных уставех онех книжников и фарисеов, еже преступиша заповедь Божию, и не почитавше себе того в грех, еже не чтити отца и матерь. но то себе имеша в большии грех, егда ядят рук не умыв. тогда же Господь о том паки обличи их, якоже выше писано. вы же противнии како смеете ныне преписовати, и церкве Божия священная писания развращати, еже рече Господь, книжником онем лицемером. и то явне превращаете писание святое. да еще наипаче прелагаете впреки Господних словес, яко бы Он тако рек, всуе мя хвалят пред образы и крестом. И то есте явно не согласився со евангелием написаша. где бо тамо написано во евангелии, укажите; ибо есте в словесех ваших евангелием утвердили. егда же ли того ни которым делом указати можите, престаните уже совращати человеки простыя и ненаученыя от истиннаго пути, и не сводите их дале в погибель. А что же в словесех своих глаголюще развращеная, никто нам того писания указати не может, когда крест творите повеле. и то есте вельми прельстистеся. ибо яве Господь Бог в прежнем законе прознаменова честныи крест, на нем же хотяше плотию вознесен быти за спасение наше. Бысть же сице [Числа, 21]. егда согрешиша люди израильтеския, и приведоша на себе гнев Божии, и посла на них Бог змиев, иже уядаху их на смерть. и возопиша людие ко Господу Богу. и повеле Бог Моисею сотворити змию медяну, и положи ея на знамении, еже есть на древе подобием креста. и егда уядаху змии человека, уяденыи же взирая на медяную онй змию, исцелевашеся. Вопрашаем же вас, или не мощно было Богу тогда дати жидом милосердия своего, кроме оная змии медяныя повешеныя на древе; ей мощен, и возможно Ему учинити кроме змии. но являше образ, понеже еже вельми быхом угрызени от мысленаго змия диявола, того ради изволи вознесен быти на знамении крестнем плотию и исцелити нас. Яко и сам рек Никодиму глаголя [Ин., зач. 9], яко же вознесе Моисей змию в пустыни, тако подобает вознестися и Сыну Человеческому. ибо о змии явно всему миру. явствено же и о кресте, нань же возшед Господь. якоже апостол свидетельствует [к гал. зач. 206], Христос ны искупил есть от клятвы законныя, быв нас ради клятва, клятву нашю исцели, остави церкви своей знамение, якоже обеща Исаием пророком глаголя [Исаия, 66]. и приидут и узрят славу Мою. и оставлю на них знамение; остави же в правду знамение честнаго креста, и показа на нем славу свою. А иже еще что глаголют против того противнии яко Иезекия царь идолы поганыя сокруши, ону змию медную разби, и бысть то угодно пред Богом [4 царств, глава 18]; ибо весть церковь Божия, яко Иезекия царь разби змию медную, и похваляет его о том. Мы же вас противники вопрошаем, чесо ради царь Иезекия разби медную змию, поведите нам. аще ли не умеете отвещати, мы вам речем к вашей срамоте, Иезекия царь бе свят и праведен. в то же время люди израильтеския начаша ону змию, яко бога почитати и хвалити; и ныне убо аще кто каков образ или крест, или что ино яко бога начнет хвалити, и мы тако мудрствующих не похваляем, но обще всех в соборной церкви проклинаем тех, яко бога образы чтущих. креста же, яко видимое се знамение Христово, в чести имеем, и кланяемся на нем Распятому, и целуем распеншагося Христа, и хвалимся Им пред неверными, и обличаем их слепоту. занеже сам Господь в день судныи сим знамением крестным обличит неверных [Мф. зач. 100]. и того ради почитаем его и поклоняемся ему. ибо онаго киота и херувимов, и дски златыя, на ней же бысть написан образ знамения, освящения Господня, иже жидове вместо бога не почиташа, и того царь Иезекия не разби; но то разби, иже яко бога начаша хвалити и почитати. Ибо не бысть та змия потребна ни к чесому до того времене, егда знамение о кресте исполнися. и о том ведати нам потреба, яко и Павел апостол учит нас, да быхом разумели о кресте, не с развратники церковными, но со всеми святыми. Наипаче же в любви вкоренившеся. глаголет бо [ефес. зач. 223], будите в любви вкоренени, и основани, да возможете разумети со всеми святыми, что широта и долгота, и глубина и высота. о ней же апостол велит нам разумети, не самем нам, но со всеми святыми. Вопросим святых яко они о том разумеша вси правду [Василий В., Кирил Иерос., Григорий Богослов, Иоанн Злат.]; и поистине исповедаша, яко то апостол о кресте написа, на той бо глаголют вшед Господь со всех четырех краев вселенныя их же восхоте призва, и оправда и прослави; и того в знамение церкви своей положи, яко пророком Исаием обеща. Аще ли хощем еще достаточне и явьствене уведати, где Господь наш Исус Христос, сам святыми своими усты по вознесении своем на небеса, крест на ополчение противных творити повеле [Иоанн Дамаскин 4, слово 12]. слышим наследников апостольских, и учителей святых церковных, и кроник такоже древних, иже по истине свидетельствуют. яко Господь наш Павла апостола чюдодейством в веру приведе, и не даде ему очима света видети, дондеже крестися и прозре [Деян., 21]. Такоже тому же подобно и великаго Констянтина царя християном, не меньшим чюдодейством в веру призва [кроники греч.]. но первее на него болезнь возложи таковую, иже не може инако исцелети, но крестися, и бысть здрав. и по крещении нача молитися Богу, дабы ему помогл на нечестиваго римскаго царя Максентия Еркулиева сына, иже бысть велии мучитель на християн и показа ему Господь и сущим с ним крест в полудни сияющь паче солнца. и бысть глас с небесе глаголющь, Констянтине, сим знамением противным одолевай. он же повеле учинити крест сребрян, и пойде с воинством на Максентия мучителя християнскаго. и повеле нести крест пред собою, и поможе ему Бог на мучителя Максентия, и избави вся люди его. и взят град Рим, и вниде вонь. Потом же паки той царь Констянтин пойде с  воиньством на Византию град, его же созда Виз царь, во дни Манасии царя Июдейскаго. византияне же не предашася ему и бишася с Констянтином дважды. первие побиша у него людей две тысящи. а во вторые три тысящи. Констянтин же о том размышляя что сотворити. и нача молитися во время вечернее. и слыша глас глаголющь, призови Мя в день печали твоея, и избавлю тя, и прославиши Мя. он же слыша глас таковыи, возре на небо, и виде крест звездами сложен, и писание над ним, сим знамением супротивляйся сопротивником своим. он же паки повеле сотворити в копии своем крест, и повеле носити в войске, и поможе ему Бог. и взя град Византию. и созда ту град велии, и прозва во свое имя Констянтин град, новыи Рим. и бысть царь градовом. И первую церковь святыя Софии Премудрости Божия в нем заложи и созда, не без креста, но со крестом. и украси ю иконами. А наипаче вси святии наследницы апостольстии в книгах своих явне свидетельствуют, яко образы, такоже и крест, во дни святых апостол быша. ему же тогда поругающеся невернии, многих верных, а наипаче самих апостол на кресте распяша. Петра верховнаго. Филиппа апостола, и первозваннаго Андрея. тойже святыи апостол Андрей пришед ко кресту не поругася, яко ныне врази креста Христова поругаются. но рече, благословен буди кресте, иже плотию Христовою освящен. и инии, якоже святое писание и историки церковныя свидетельствуют, велию честь и поклонение кресту сотвориша. а еже некотории отступницы церкве Божия верити не хощут, и тому не дивися. тако бо они извыкли, иже егда что и сами противяся церкви Божия пишут, то паки к кроникам, и учителем святых и апостольских наследников писанием прибегают, исповедающе их правду. сами же противное и самосмышленое своея веры неправду и хулу свою, во святыя книги в строках приписуют. а апостольских, и их наследников, и святых отец писаниям верити не хощут. Мы же не внимаем жестосердию их, но и еще им покажем от писании святых апостольских и наследников их и учителей церковных, яко крест на нем же распят бысть Господь наш Исус Христос, его же царица Елена, мати святаго Констянтина, со многим трудом и молитвами обрете [Зосима книг. 2, 1; Феодорит 1, 13; кроники греч.; в слове на Воздвижение креста]. с ним же обрете и ина два, на них же два разбойника быста, распята со Христом. и восхоте царица истину уведати, которыи есть крест на нем же сам Господь распятие волею претерпе. и повеле полагати по единому на мертвую девицу. и егда возложиша той крест на нем же распят бысть Живодавец наш Христос, и оживе мертвая девица. и того ради чюдесе в то время, много жидов вероваша во Христа. с ними же и Июда иже потом наречен бысть при Макарии патриархом во Иеросалиме. Тогда же явне исполнися слово Духа Святаго, иже рече пророком [Премудрость, 14]. Благословится древо, им же бывает правда. мнози бо тогда его ради крестишася, и благословение от Бога прияша [летописец греч.]. Царица же Елена созда церковь во Иеросалиме, едину во имя Воскресения Христова над гробом Господним. другую же на том месте где крест Господень обрете. третию в Гефсимании, идеже гроб пречистыя Богородицы. и иныя церкви по иным местом повеле создати. крест же Господень вложи в ковчег сребрян. и от него взяв часть и гвоздие, ими же Господь наш на кресте пригвожден бысть, и принесе с собою в Констянтин град, и отдаде сыну своему царю Констянтину. царь же Констянтин взя от нея с великою честию, и повеле един гвоздь в шапку свою воинскую вковати. а иныя гвозди во узду коня своего царскаго, с нею же всегда ездяше. и тако исполнися пророчество Захариино глаголющее [Захария, 14]. будет в день он, еже во узде коня, свято Господеви Вседержителю. Врази же креста Христова ныне с неверными жиды, и с нечестивыми еллины поругаются, мняще, яко бы срамотная речь есть, но токмо в них срамотно. у Господа же Бога, иже с тем приидет судити, и во всех верных, слава есть. Глаголет бо апостол, слово крестное погибающым убо уродство есть. спасающимжеся, сила Божия есть [коринф. зач. 125]. А якоже не постыдеся взыти на крест волею, и не постыдится с ним приити, тако и нам стыдетися не требе. ибо кто стыдится злодеем повешеным на древе, стыдится и древом тем на котором Он повешен. такоже кто стыдится крестом, стыдится и Тем которыи распят есть на нем, яко о том Иоанн Златоустыи свидетельствует [в беседе 54]. аще бо мы места видим, на них же повиннии осуженицы злодеи посекаеми бывают, и страх и ужас нас обдержит. Помысли како утерпит диявол и бесове, оружие видящи им же всю силу их разруши Христос. и змию отсек главу. да убо постыдишилися и ты таковаго добра, да не постыдитлися и тебе Христос, когда приидет со славою своею. и знамение напред явится светлее солнца. ибо приидет тогда Христос, глас испущающии видением, и вселенней всей показуя приход Владычен. Ктому же и о том нам ведати потреба, яко во время втораго славнаго и страшнаго пришествия Христова, будут назнаменаны вси избрании Божии, знамение честнаго креста; еже Иоанн еангелист именует печатию Бога живаго. глаголя тако [Андрей Кесарийскии во Апоколепсисе, глава 7]. и видех, и се аггел от всхода солнца имея печать Бога живаго, возгласи глаголя, не вредите земли, и моря и древа, дондеже запечатлеем рабы Бога нашего. Что же противнии, егда ныне глаголете, а на что той крест; ибо она печать будет крест, яко учители наши святии, наследницы апостольстии свидетельствуют, их же свидетельств ныне не пишем, того ради, да бы сами есте почитали книги их. ибо вельми достаточны, и широце от многаго святаго о знамении честнаго креста пишут. А ныне сие малое предложение с любовию почитающе вернии, не внимаем наругателем креста Христова. но хвалимся им со апостолом Павлом глаголющим, мне не буди хвалитися, токмо о кресте Господа нашего Исуса Христа. что есть еже хвалитеся о кресте; глаголют о сем святии отцы [Златоуст и инии]; понеже тако нас Господь наш возлюби, яко и сам себе волею предал, и не стыдеся на таковом знамении быти распят. не постыдитжеся им, и во время втораго своего страшнаго пришествия, якоже Матфей евангелист явствено свидетельствует [Мф. 106], его же послет пред собою. Такоже хвалящеся возлюблении всегда взирающе на знамение честнаго креста, кланяемся тому иже вознесен бысть на нем, и непрестанно молимся, дабы сподобил нас крест терпения от сопротивных наших, и всякия скорби, и изгнания и болезни, с радостию на себе носити. и сам врагом нашым по своей воли да воздаст. и распаленыя их стрелы лукавно на нас движимыя угасит, и прочии живот наш весь доконца во святыни совершит. В день же он егда явится знамение честнаго креста, и за ним и сам Господь приидет судити живым и мертвым, да поставит нас одесную себе. и благословеныи глас созывающь в царство небесное, праведных глас слышати да сподобит. Потребно же и сие нам ведати, чего ради знаменаем лице свое крестообразно;
 
О кресте, чесо ради знаменуем лице свое крестообразно.
 
Воистину не презре нас Господь своим милосердием, но и паче и помилова и призре на нас своею милостию с высоты святыя своея, и подаде нам имя ново,  еже зватися християны. слово бо Его истинно есть и праведно всегда, и николиже изменяется. якоже рече, небо и земля мимо идет, словеса же Моя не мимо идут. Тако же и инде пророком Исаием глаголя, работающым Мне прозовется имя ново. Се бо есмы прозвани именем новым мы християне, якоже рекл тем же Исаием к новым работником своим, и приидут и узрят славу Мою, и оставлю на них знамение. якоже рекл Господь [Мф. 101, Мк. 62, 65, 66], тако и сотвори, остави знамение честныи крест о нем же предвидяше Духом Святым другии пророк, яко бы дивяся Божией премудрости глаголя [Пс. 59]. дал еси боящымся Тебе знамение, еже убежати от лица лука. о том же вси святии наследницы апостольстии, свидетельствуют сице [Феодорит, Максим, Афанасии, Кирил Иерос., Иоанн Златоуст. и инии отцы святии]. яко боящымся Его верным и правым християном дадеся крест. им же знаменующе лица своя, убегают от лица лука, сиречь от всякаго невета и козней бесовских, и иже уязвляют беспрестани сердца верных, лукавыя духи завидяще празднующим чисто и богоугодно живущым. О том же глаголют святии отцы. егда приходит злыи помысл, или приводит тя ко греху, прекрести лице свое, и призови Распеншагося на кресте, глаголя, Господи Исусе Христе Сыне Божии помилуй мя. и тако удалится от тебе помысл лукавыи. и укрепишася в теплоте любве Христовы. и будеши правым християнином единыя соборныя апостольския церкве. тем бо вернии ведоми и явствени бышя, не токмо сами между себе, но и пред неверными мучители, когда неких от них многих мучеников Христовых, мучиша злочестивии царие, возбраняюще им веровати во Христа. и егда не могоша их от Христа различными муками отлучити, повелеша им языки резати. и потом вопрошаху, еще ли веруют и проповедают Христа. они же пред ними языком глаголати уже исповедания веры не возмогоша но полагаху знамение честнаго креста рукою на лица своя. и тако по словеси апсотольскому прославляли Бога в душях и в телесех своих. потому же и кончину мученическу прияша. се же и от тех малых свидетелей явно есть, яко и апостоли Христовы, и мученицы полагали знамение честнаго креста на лица своя рукою своею. в том бо глаголют святии отцы, великая тайна Святыя неразделимыя Троицы Отца и Сына и Святаго Духа прославляется. и яже во святом крещении треми в воду погружении, тридневное Христово погребение и воскресение быти показуется. яко же апостол глаголет. елицы во Христа крестихомся, в смерть Его крестихомся, и спогребохомся с ним крещением в смерть. приложи же и се. да яко же Христос воста от мертвых славою Отчею, тако и мы во обновление жизни ходити начнем. Тому же подобно и знамение честнаго креста, все доброе веры таиньство учит нас познавати тайну. ибо три перста сложити вместо, великии и малыи, и третии что подле малаго, исповедуется тайна божественых трех ипостасей, Отца и Сына и Святаго Духа, единаго Бога в трех лицех. Два же перста вышнии и среднии великии вместо сложити и протягнути, показуется тайна самого Господа нашего Исуса Христа, иже есть совершен Бог, и совершен человек. Той же среднии великии перст мало преклонити, исповедуется тайна, иже есть Сын Божии преклонь небеса, и сниде на землю, и бысть человек нашего ради спасения. тем же два перста сложив. первое кладет их на главу, или на чело, исповедуем, иже есть едина истинная и вечная наша глава Христос, даде главу выше всех церквей, яже есть тело Его. Таже полагаем их на живот [на пуп], исповедуется снитие Его на землю и еже в пречистей утробе Богоматере безсеменное зачатие Его, и девятомесячное обитание явьствене возвещаем. Той бо един пройде утробу ея, яко солнце стекло, невредив ключа Девыя рожеством своим. Таже полагаем их на правое плече, исповедуем; яко седит одесную Бога Отца, дондеже положатся врази Его. Таже на шуее плече полагаем, образующе, яко приидет второе на суд, и воздаст сущым ошую муку вечную, и сущым одесную живот вечныи. И тако мы прекрестив лице свое знамением честнаго креста покланяемся Богу молящеся, дабы нас шуяго стояния избавил, и благословение свое дал нам. Блаженныи Феодорит глаголет, како подобает рукою креститися, сице благословити рукою и креститися. три персты равно имети вкупе, великии иже глаголется палец, да два последних, исповедуется тайна по образу троическому, Бог Отец, Бог Сын, Бог Дух Святыи. не три бози, но един Бог в Троице. имены разделяется, а божество едино. Отец нерожден, а Сын рожден от Отца, а не создан. а Дух Святыи ни рожден ни создан, но исходен. трие во едином Божестве. едина сила, едина честь, едино поклонение от всея твари, от аггел и от человек. тако тем трем перстом указ. А два перста вышнии, да среднии великии вместо сложити и простерти. великии же перст имети мало наклонно. то образует два естества Христова, божество и человечество, Бог по божеству, а человек по вочеловечению, во обоем совершен. Вышнии же перст образует божество, а нижнии человечество. понеже сшед от вышних, спасе нижняя. Согбение же персту толкуется, преклонь бо небеса сниде на землю нашего ради спасения. Да тако достоит креститися и благословити. тако святыми отцы указано и узаконено. такова убо сила есть знамения честнаго креста, им же вернии знаменаемся, егда молимся, исповедающе таиньствене Спасово смотрение, еже от Бога и Отца прежде всея твари рождение, и еже свыше на на землю Его снитие, и распятие, и второе Его пришествие еже есть запечатление всему, еже о нас человеколюбному смотрению. То бо прообразуя и Яков патриарх, сие божественое страшное знамение, премени руце свои положи накрест, егда благословляше внучата своя, Ефрема и Манасию, сыны Иосифовы [Бытия, 48]. Такоже и Моисей егда повеле сыном израилевым еще в Египте кровию агньца знаменати на четыре страны двери домов их, сиречь верхния и нижния пороги. и яже обоих дву стран колоды, да не внидет к ним погубляяи первородныя египетския. и то явьствено прообразовал крест. То же знамение предобрази той же Моисей, егда жезлом своим прямо порази Чермное море. и разделися вода сюду и сюду, и бысть путь сух посреде моря. израильтяне же пеши немокреною ногою преидоша на он пол. По прехождении же их Моисей тем же жезлом образно впреки порази в Чермное море. и слияся вода во едино совокупление, и потопи фараона мучителя. Тако же когда бысть сеча со Амаликом людем израильтеским в Рафиниде [Исход, 17]. Моисей же шед на гору, распростер руце крестообразно. и по которое время держал руце распростерши на крест, и в то время гнали израильтяне Амаликово войско. а егда же опустил руце, и нача премогати и бити израильтян Амаликово войско. того ради Аарон и Иор поддержаста ему руце, един с единыя страны, а другии с другия, и тогда израильтяне побиша всех Амаликова войска. и то явно тоже было знамение и подобие честнаго креста. Тем же образом видение и Иезекииля пророка, иже виде мужа облечена в ризы священническа. ему же рекл Господь, иди среди Иеросалима, и дай знамения на лица мужеска, иже болезнуют и воздыхают о беззакониих бывающих посреде их, и поби их всех на них же знамение несть. Что же противниче, рцы [еда], невозможно ли Богу кроме знамения, или знаков оных, иже мазания кровию дверей на крест во Египте, тако же и держания рук Моисеовых на крест, или якоже и во Иеросалиме дадеся людем на лица их от погибели; ей возможно. но того ради повеле творити таковая знамения креста, да тем покажет над ними крепость милосердия своего. И о сем разумейте, яко то знамение бысть прообразование нынешнему кресту. аще хощете уведати со онеми святыми наследники апостольскими и ученики Христовыми. их же и сам апостол слушати, и с ними смотрения таин Божиих от века сокровенных разумети повелевает [ефес., 223]. О том же блаженныи и Феодорит толкует се ясне [Феодорит в толк. Езекииля]. Блаженныи же Иезекииль пророк такоже показа в видении, иже виде мужа или аггела посланнаго от Бога, дабы обшел все место, и положил на челе знамение уязвеным от беззаконных людей. то бо есть сень и подобие нашему знамению. истинное бо знамение мы от Бога и от любве Его прияхом крест. Афанасии же Великии разуме оно слово пророческое, еже рече. дал еси боящымся Тебе знамение, еже убежати от лица лука. верным же победа людем християном дано есть носити и имети всегда крест на лицах. то бо есть глаголет святыи Кирил знамение, его же бегает противник душ наших диявол. Тем бо глаголет Василии Великии, Христовы мученицы яко хоругвию вооружившеся, и оградившеся крестом победиша диявола, и мучителей разрушиша, и еллинское многобожие упраздниша. С ними же Златоуст Иоанн, и инии мнози, и спроста вси наследницы апостольстии, иже от апостолов поряду друг друга пишут и воспоминают нам, да быхом коегождо дне, и коегождо часа, во всех делех наших начиная, и ложася, и вставая, знаменати нам лице свое честнаго креста знамением не стыдяся, а не внимати неверным и прельщеным человеком. то бо есть знамение на обличение их самовластьства. о том бо глаголет Василий Великий. знамение сие яко венец Царя нашего Христа на главе своей носим. Еще же бысть чюдо страшно и преславно и удивлению достойно. егда был Мелетий патриарх Антиохийский. и при том собор бысть арияном с верными в лета его. и много глаголющим окаянным арияном, о развращении православныя веры. паче же о самом божественем таиньстве. И тогда востав богословесныи муж Мелетий патриарх, правила по закону управления имея. и людем просящым у него скораго учения. он же по божественей ему благодати, хотя еретики устрашити и посрамити, и вся люди удивити, показа им три персты, и не бысть знамения. потом же два совокупль, и един пригнув, и благослови люди. и изыде от нея огнь яко молния. и достохвалныи он испусти глас. трие убо ипостаси разумеваем, о едином существе беседуем, и тако посрами еретики. и вси людие страха и трепета исполнени быша, и святаго мужа похвалиша. и возрадовашася о бежественей благодати, и о посрамлении еретик; Такова убо есть сила сложения перст, и крестнаго знамения.
 
О том же крестном знамении еже кладем на лица своя,
Максим Грек пишет в своей книзе сице.

 
Ведомо да есть тебе что, якоже в божественном крещении, треми в воду погружении, тридневное Спаса Христа погребение и воскресение гадает церковное предание по божественому гласу глаголющу. Елицы бо во Христа крестихомся, в смерть Его крестихомся. спогребохомся Ему крещением в смерть. Тая же аки сказуя что есть еже в смерть; приводит глаголя: да яко же Христос воста от мертвых, такоже и мы во обновлении живота поживем духовно, исполнь всякия правды и преподобьства и святыни, совлекшеся ветхаго человека, сиречь лукавых и богомерзских похотей и деянии плоти и духа. яко же убо крещением таиньствене предает сия нам апостольское предание, сице и знаменованием честнаго креста все вкупе благоверия таиньство учит ны исповедовати таиньствене, глаголю самую Святую и поклоняемую Троицу, и еже с небесе Единороднаго на землю снитие и распятие Его. и еже с небес второе Его пришествие егда хощет судити живым и мерствым, сиречь праведным и грешным. Совокуплением бо триех перст, сиречь палца, и еже от средняго малаго, тайну исповедуем богоначалных триех ипостасей Отца и Сына и Святаго Духа, единаго Бога трое. Протяжением же долгаго и средняго, сшедшася два естества в Христе, сиречь, самого Спаса Христа исповедуем совершена Бога и совершена человека во двою существу и естеству, веруемаго и познаваемаго. Положением же перст на челе, исповедуем два некая сия, яко от Бога и Отца родися, яко же и наше слово от ума исходит. и яко свыше сниде по божественому слову глаголющему, преклони небеса и сниде. Я положением перст еже на пупе, снитие Его еже на землю, и еже в пречистей утробе Богоматере, безсеменное зачатие Его. и девятомесячное вселение явствене возвещаем. А обвожением еже оттуду всея руки на десную и на левую страну, ясне образуем хотящии изнести горшии ответ он от праведных, стоящих одесную Судии, на нечестивых и грешных, по Спасову божественому гласу глаголющу к противящимся и не покоряющимся июдеом. Того ради слышав сия свидетельства всяк верныи, да не нерадит, и не полагает сего ни во что, и еже быти без боязни, и с чистою совестию, полагает креста знамение на лице свое, яко же божественая писания указуют. Есть же и во отеческих книгах писано о сем, иже аще кто не по подобию лице свое знаменует, сиречь не истово крестит гордости ради или лености, и махает семо и овамо, и тому маханию беси радуются.
 
О хождении со кресты. и чесо ради, тако церковь Божия творит.
 
Иже невернии жидове, еще от того времене, егда Христос от мертвых воста, хотяху тридневное Его воскресение утаити, якоже евангелист Матфей свидетельствует [Мф., 115], даша стражем много сребра, дабы поведали пред людми, яко нам спящим, пришедше ученицы Его нощию и украдоша. и аще услышано будет то у игемона, мы его утолим, а вас беспечалны сотворим. Они же взяша сребреники, и сотвориша тако, якоже их научиша. и разыдеся слово то в жидох и до сего дне. Того же ради церковь Божия по вся лета творит память тридневнаго воскресения Христова. Не токмо бо собираемся в дом Божии молитвеныи славити, яко воистину Христос воскресе из мертвых, но и знамением тем, еже есть с честным крестом, на нем же Он, яко же апостол Павел свидетельствует [колос., 255], раздра рукописание учении, еже нам бысть сопротивно. с тем знамением яко хоругвию изображением Избавителя нашего, якоже родися от пречистыя Девицы плотию, и како Его на руку своею поноси, и яко от мертвых воскресе. И идем от церкве, до церкве не стыдящеся неверных жидов, и всех иже жидовская мудрствующих врагов креста Христова. и пред всеми народы истинное Его воскресение славяще поем, Христос воскресе из мертвых, и дарова нам живот вечьныи. Аще бо противнии стыдятся того творити, к славе Избавителя своего, у них бо в жилищих их нигде креста, ни образа Христова несть, по писанию Златоустаго, яко лисы в яме седят. Мы же вернии помняще глагол Избавителя своего, яко же рек сам святыми своими усты, Марии Магдалыни, и к другой Марии, иже сретосте Его идуще от гроба, и падше на нозе Его поклонистеся Ему [Мф. 115]. Он же рече им, не бойтеся, идете возвестите братии Моей, да идут в Галилею, и тамо узрят Мя. они же шедше, и поведаша учеником. и потом и иным многим. Такоже и ученики Христовы скоро по воскресении Его, не токмо собрашеся сами между себе проповедаху Христово воскресение, но и по местом ходяще, и по путем кого сретаху, о том поведаху, яко убо и самого Господа видеша идуща путем со апостолы с Лукою и Клеопою, и глаголюща и вопрошающа которую речь между себе имеша. они же тогда ни о чем ином не глаголаху, токмо о воскресении Христове начаша поведати. Такоже и мы даже и до днесь о том глаголем и поем ходяще со кресты в день Воскресения Христова. И аще кто нас вопрошает, которое исправление в вас, чего ради тако ходяще по местом поете; Мы же к ним отвещаем глаголюще, жидове бо и до днесь таят воскресение Христово. того ради мы вернии не токмо в дому Божии молитвенем, но и по местом ходяще славим тридневное Христово воскресение. такоже и в день сшествия Святаго Духа ходим со кресты, прославляюще Бога и Спаса нашего Исуса Христа, воскресшаго от мертвых, и возшедшаго на небеса, и обещание Духа Святаго от Отца прияша, и излиявша на ученики своя в день пятьдесятныи. тому же жидове не верят. того ради церковь Божия обличает окаменение сердец их, и всех неверных. не токмо в собрании своем, еже есть в церкви, но и по местом со всем верным народом, ходяще поем и славим Избавителя своего в Троице единаго Бога, и Ему честь воздаем пред всем народом глаголюще, Пресвятая Троица Боже наше слава Тебе. Тако же и образ Спаса нашего Исуса Христа. како родися плотию от чистыя девы Марии, и како Его  младенца на руках своих поноси, ту же со кресты носим, и тем обличаем окаменение жидовскаго неверия. и показуем им, яко Месия его же они ждут прииде уже по пророчеству Исаину [Исаия, 9], и яко отроча родися нам Сын, и дастся нам. и нарицается имя Его велика совета Аггел. чюден советник, Бог крепок. о нем же убо пророчествова Еремия [Варох, 3], се Бог наш, и не приложится ин к Нему, на земли явися и с человеки поживе. о Нем же явствено и Павел апостол написа сице [Тимоф., 284], велика благочестия тайна, Бог явися во плоти. А еже Бог во плоти явися, и с человеки поживе, и образ свой яко же мнози наследницы апостольстии и кроники древнии свидетельствуют, на плашанице Авгарю князю посла, иже есть и до ныне о том церковь Божия от начала веры, еже есть от дней апостольских, якоже выше во второй главе показует, даже и до днесь на большую славу истиннаго Его вочеловечения образы написует. и не токмо в церкви, но и по местом носящи неверным показует, пишущи Его образ на иконе. И Его матерь пречистую девицу Марию, иже бысть от колена Июдова, от корене Иесеова. и яко младенца на руку своею поноси. якоже о том Исаия пророк июдеом глагола [Исаия, 7]. се Девая во чреве приимет и родит сына, и нарекут имя ему Еммануил, еже есть сказаемо с нами Бог. Паки же речем неверным жидом. ибо мы образов не имеем яко Бога, якоже они укорят нас, но токмо в таковой чести имеем образ Христов, якоже они киот Божии, и херувимы и дску злату, и иное все строение церковное имеша [Исход, 25, 26, 27, 28]. паки же тамо повелением Божиим в дому Божии свещи у нас есть, якоже и у апостолов бысть. о том бо апостол свидетельствует сице [Деян., 43], бысть же и свещ множество в горнице идеже быхом собрани. якоже июдеи в дому Божии кадиша по глаголу Божию. и яко оны царие перьсидстии, принесошя Христу на рожество кадило [Мф. 3]. и якоже Захария отец Предтечев кажение творяше [Лк., 2], тако и ныне церковь Христова приносит кадило имени Его на всяком месте, по пророчеству Малахиину [Малах., 1]. и якоже повелением Божиим израильтяне хождаху с киотом молящеся Богу [Исус Нав., 3, 6]. и якоже идоша от горы Господни в путь, тогда ковчег Господень несен бысть пред ними. тогда Моисей моляся Богу глаголя, воскресни Господи да разсыплются врази Твои, и все ненавидящии Тя [2 Царств, 6]. Такоже и церковь Христова ходящи со образом Избавителя своего молящися Ему, да избавит нас от всех врагов наших видимых и невидимых. Что же иже ныне противнии поругаются; како не боятся гнева Божия; яко и царицу Мельхолу прокля неплодством. она бо поругася и посмеяся Давыду царю, егда он со всем домом израилевым идяше пред киотом Божием, и скакаше и играше, и весь народ веселяшеся и пояху гласом великим хваляще Бога [2 Царств, 6]. виждь яко сени ради тако пострада, якоже апостол свидетельствует [евреом, 323]. закон сень суть приидущих благ, а не самя истина. что же ныне за самую истину, не сотворит ли Бог смехотворцем и поругателем неплодства и забвения, и не разорит ли их, якоже разори стены Ерихонския, егда собрашася сынове израилевы со священники и ношаху киот Божии поюще хваляще Бога [Исус Нав., 3, 6]. токмо с верою, а не зверьски воплем молимся, и на Господа все упование наше положим. Он бо сам рек, на Мене положи мщение, Аз воздам [2 закон., 32]. Мы же прославим Господа Бога всеми силами нашими, в телесех, и в душах наших, и все в славу Его творим. Глаголет бо апостол [коринф., 147], аще ясте, или пиете, или ино что творите, все в славу Божию творите. Семже не в славу ли Божию есть, якоже церковь Христова ходящи со образом Спаса своего, и знамением крестным, с которым Он сам в день судныи на обличение беззаконных приидет [Мф., 100]. воистину в славу Божию есть. Паки же не стыдящеся всех противных вси вернии со кресты ходят, славяще Избавителя своего, якоже и оны люди избраннии Божии в прежнем законе, не стыдящеся с киотом Божиим хождаху. якоже пишет [Исус Наввин, 6], весь израиль со старцы и книжники их, идуще оба полы ковчега, пред жрецы и леввиты подвизающими ковчег завета Господня, и тем побеждаху много врагов своих. такоже и мы ныне, не стыдящеся врагов Божиих, и наших, воспоминает нам церковь Божия ходим со кресты, яко да и нами Бог не постыдится, в день страшнаго онаго суда. А иже тем противнии нам о том поругаются, якоже мы хвалением святых праведных, хвалим Бога, мы же им противу того тако отвещаем.

 

Просмотров: 47 | Добавил: vendin

Р П с Ц

Храм г. Меленки

Церковная лавка

ДРЕВЛЕКАЛЕНДАРЬ

ЗНАМЕННОЕ ПЕНИЕ

КАНОНЫ

ФОРУМ

Вход на сайт

Поиск

Календарь

«  Апрель 2018  »
ПнВтСрЧтПтСбВс
      1
2345678
9101112131415
16171819202122
23242526272829
30